Hevda han planta til eigen bruk
På siste dag i rettssaka denne veka, skal ein av mennene i 40-åra og nordmannen i 40-åra forklare seg.
Publisert
Sist oppdatert
ÅLESUND: Ein av mennene i 40-åra vil ikkje forklare seg, og difor vart politiforklaringa hans lest opp. Han har tidlegare erkjent delvis straffskuld. Noko som betyr at han erkjenner straffskuld for plantasjen, men ikkje at det var organisert kriminalitet.
I politiforklaringa seier han at det ikkje var nokon andre som kjente til plantasjen. Det var han som hadde drifta den åleine. Han meinte også at han berre dyrka til eige bruk.
Han seier seg likevel villig til å svare på spørsmål.
I vitneboksen blir han spurt om innblandinga til mann i 30-åra, tiltalt for medvirking. Då svarer mannen i 40-åra at han angrar på at han blanda inn den andre tiltalte.
Nordmann i 30-åra som ikkje møtte opp på tysdag, er framleis ikkje til stades. Difor held rettssak fram utan han.
Ønsker å forklare seg
Nordmannen i 40-åra, som er eigaren av huset, forklarar seg til retten. Han erkjenner ikkje straffskuld, og fortel at han ikkje visste noko om plantasjen.
– Gården min har blitt leigd ut, eg vart tatt på senga av heile greia. Eg kjenner ikkje til det, seier han i vitneboksen.
Han seier vidare at det var nordmannen i 30-åra som hadde ansvaret for utleige.
Huseigaren forklarer også at han har vore innom gården nokre gongar, men han har ikkje oppfatta at det skjedde noko ulovleg der.
Bakgrunn
Måndag starta rettsaka mot seks tiltalte i den omfattande narkotikasaka.
Politiet aksjonerte mot ein gard på Standal i Ørsta, januar i år. I låven fann dei ein cannabisplantasje. Fleire menn vart pågripne og sikta for å stå bak.
Politiet har beslaglagt omtrent 23 kilo cannabis, og stansa produksjonen av ytteligare 9,6 kilo, i følge tiltalane. Totalt skal politiet ha funne over 300 plantar på garden.
Éin av dei tiltalte erkjenner seg skuldig etter tiltalen. To av dei tiltalte sa seg delvis skuldig. Huseiger erkjenner seg ikkje skuldig etter tiltalen, saman med éin av dei andre tiltalte. Den siste tiltalte nekta å svare på spørsmål og nekta å forklare seg for retten.
Rettssaka held fram måndag, då er det vitneforklaringar.
