Folkestad ungdomsskule overlevde – for no
Volda kommune står i djup økonomisk gjeld – på same måte som fleire andre kommunar på Søre Sunnmøre. Eitt av føreslaga for å redusere kostnadene har vore å legge ned Folkestad ungdomsskule, noko bygda reagerte kraftig på.
FOLKESTAD: Like før jul blei framlegget nedstemt. Foreldrerådet ved skulen (FAU) var tidleg ute med å protestere, og la fram fleire argument for å behalde skulen. Ein av dei som er glade for at forslaget blei nedstemt er FAU-leiar Emilie Forberg-Olsen.
– For dei ungdommane som bur innerst i bygda, blir det veldig lang skuleveg. Det vil påverke trivsel, fritid og moglegheita for å gjere lekser, seier Forberg-Olsen.
Ho understrekar viktigheita av ein liten skule.
– Lærarane kjem tettare på elevane, og vi opplever at det fører til eit godt læringsmiljø, seier Forberg-Olsen.
Ho fortel at oppslutninga frå bygdefolket har vore tydeleg.
– Eg føler absolutt at eg har bygda i ryggen. Ved å bevare skulen held vi bygda i live, legg ho til.
Sjølv om framlegget om nedlegging blei avvist denne gongen, erkjenner Forberg-Olsen at trusselen ikkje nødvendigvis er over.
– Eg går ikkje rundt og fryktar det, men det ligg alltid i bakhovudet. Dei får ikkje legge ned ungdomstrinnet utan ein kamp, avsluttar ho.
Uviss kva framtida bringer
Oppvekstsjef i Volda kommune, Per Ivar Kongsvik, stadfestar at det i dag ikkje ligg nokon nye planar om nedlegging. Samstundes erkjenner han at det økonomiske biletet i framtida kan endre situasjonen.
– Per i dag ligg den ballen død, men realiteten er at budsjettsituasjonen i 2026 kan få betydning for korleis vi går vidare, seier Kongsvik.
Er skulen freda framover?
– Vi kan ikkje seie at den er endeleg freda, men vi veit heller ikkje kva framtida vil bringe, seie han.
Ein oversiktleg læringsmiljø
Rektor ved Folkestad ungdomsskule, Tom Erik Bogen, peiker også på fordelane ved ein liten skule.
– Vi vil seie at vi har eit oversiktleg læringsmiljø, med gode moglegheiter til å tilretteleggje for elevane, seier Bogen.
Skulen har også fungert som mottaksskule for ukrainske flyktningar.
– Vi har plass til dei, legg han til.
Samstundes er han realistisk med tanke på framtida og at det er avhengig av at elevtalet ikkje søkk lengre nedover.
– Vi kan ikkje drive skule for veldig få elevar for kvart pris, seier han.
